Friday, December 11, 2009

鮑魚擦頭

天氣太熱
悅兒剪咗個鮑魚擦頭乘涼

好攪笑 :p

fin

由最初知道公司要大地震
到宜家既成定局
只不過係短短的兩個月
最終分拆成兩間公司亦係始料不及
但係好附合一向狗咬狗骨作風
又分成兩黨暗暗作怪

個人覺得去或留都係危危付
相煎又何太急呢?

不過係呢度兩年
始終都有啲唔捨得

有人等咗我一年玩桌球
終於等咗我Last day先至等到
有好多平時唔覺好熟嘅人嘅擁抱

又有好多人當睇我唔到黎畫清界線
(我介紹入嚟嘅表弟
估唔到最後連msn嘅招呼都無)
亦有特登等到呢兩日先黎落井下石

確實係感觸良多

Friday, December 4, 2009

Ball pit

Toys `r` us
$50 for the ball pit (+20 plastic balls)
$20 for the 100 plastic balls

Sunday, November 8, 2009

只要蝦身、唔要蝦頭

上市公司有度唔好,
樓上話cut人就cut人,
之前已經炒咗30人,
宜家仲要交多成50人,
好明顯係只要蝦身、唔要蝦頭

然後又只好分割成3間公司名
近排人心惶惶
走入黎我房問前程嘅人越黎越多
其實我自己都唔知有幾多人跟我地走

只有我表弟同事後知後覺
早幾個星期叫佢轉team
佢又話厭辛苦又、又乜又物
宜家佢留係蝦頭部分
我只能夠睇佢自己做化

始終蝦身定蝦頭我自己都唔肯定

Thursday, November 5, 2009

1

悅兒壹歲喇~~~~

:D

Time Traveler's Wife

Its been a couple of years ago I finished reading this book, and finally its now up on the screen...

Its just like a kinda of few days ago I had just closing that book, and then I am sitting here with my wife in the cinema, just like a time travel to me as well.

Thanks God giving me the life, and the patience to wait to see the future.

Saturday, May 16, 2009

食手指

悅兒最大嘅壞習慣係食手指
一有機會就伸手入口
快到好似無影手咁
想阻止都黎唔切
仲要露出"好得戚"嘅表情

於是乎我諗咗用檸檬汁塗係佢雙手嘅方法
悅兒一伸隻手入個口
咪起哂嘴臉
之後趕緊抽番隻手出黎
面色凝重
好似諗緊點解自己隻手唔同咗?

之後悅兒又試咗幾次
我又每次乘機補番檸檬汁上佢隻手
如是者試咗數回
悅兒知道係我出古惑
於是一往無悔將佢雙手恨恨地送入口裡
忍住開頭嘅酸味係咁啜
由於佢知道如果唔攞返隻手出黎
啜啜吓佢就無味
我又無機會補檸檬汁

最後佢又用好"得戚"嘅笑容
啜住手望住我 ...

-_-a

親愛的悅兒:

如果你三歲都戒唔到食手指
你父親將會改用Mustard塗係你手上

.\_/.v

頭頂出煙 ...

日日做到無停手
總有出煙嘅時候...

Wednesday, May 13, 2009

又加班

我發覺呢個個加班情況係無改善到
無論我已經分配好哂下面啲人
根據我個schedule以為唔使加班啦
點知又係臨收工先插啲嘢入黎
又唔想樓下加班
結果放哂啲人
又剩番我

條靚臨走前仲以為我係工作狂
唉。。

光頭和尚仔

悅兒一出世就有頭髮
但係過咗一段時間之後
有日悅兒沖涼後媬母好驚咁走出黎
話悅兒盆沖涼水有好多毛
然後又長吓長吓到宜家一層毛毛頭髮
十足十和尚仔。。。

幸運輪

唔知道第幾次中獎
今次抽中DVD禮券
但係當去到影碟鋪
又真係發覺無乜片值得買
結果買了Pirates of Caribbean第一和第二集
但係又唔夠錢買第三集(雖然已經睇過)
期待下次中獎可以補番

Thursday, May 7, 2009

搵屋搬

自從樓市不斷下調
美國出現另一種現象
就係兩夫婦都失業
然後租唔起屋要帶埋仔女搬番娘家住

呢種現象開始係澳國出現
租屋市場開始有屋無人租
早前一個單位過百人睇、人頭湧湧
間屋有幾大就企滿咁多人
宜家得我一個人去
然後仲後來打俾我問我減租制唔制
完全反映出市場走緊下坡

但係媒體就繼續唱旺樓市點好點好
政府又推出兩萬元首次置業津貼云云
唔買樓等幾時咁樣

實情係我身邊啲各行各業朋友都好似裁緊員
有啲成層樓炒魷魚
有啲公司Move緊去印度
宜家team人等住炒

我諗心急不在一時三刻
何必急於一年兩年呢?

加班

我阿頭無端端應承人地會交到貨
又唔睇吓你班靚有幾無能、又幾咁無責任感
最後又搵着我黎攪
如果唔係B君幫到手
真係追得上我嘅進度
如果唔係我咪又通頂?

悅兒今日突然識用雙腿左右左右扶住行
如果再加班攪到我聽唔到悅兒嘅第一句說話
我諗我會憒憾終生

東家唔打就打西家
我地呢行出面大把工...

反而B君話忙碌啲時間仲易過
佢真係唔同咗好多...

Tuesday, May 5, 2009

City to Surf 2009

公司有同事跑馬拉松
令我不禁躍躍欲試
打俾我阿媽話我要跑馬拉松

媽: 邊個跑馬拉松呀?
(佢簡直唔相信佢隻耳)
我: 跑半百啫
媽: 你咪呀!
我: ...
媽: 你平時又唔多做運動
我: ...
媽: 正所謂仔細老婆嫩
我: ...
(我阿媽仲未講完)

睇黎呢個志願唯有寄望悅兒去完成...

Monday, May 4, 2009

墨國同事

新聞話墨國政府呼籲國民唔好出國
以避免不公平對待
尤其是中國、香港

身為香港人
今朝一早我搵咗公司墨國同事
再問左佢一次係咪墨國人
然後就問佢要咗個hug
雖然呢啲嘢係西方係好正常
但係今次佢覺得好愕然
因為我係出名唔多說話
(正如女律師所講,一年都無兩句說話)

我問佢墨國有乜最大影響
佢話就係少咗人係街親咀(正常社交)
因為咁樣好容易傳染

忙 而努力

名義上印度仔已經離開咗我嗰組
唔使顧忌大佬制

而雖然我近排好忙
但係我都好低調
好努力咁...
一有機會就抽秤印度仔

我諗我地前世一定十淵九仇

係我企嘅日子
悅兒識坐

:)

Thursday, April 30, 2009

雖然我記唔起我出生那天、
點樣由我阿媽肚爬出黎
但係我記得悅兒出生那天的每一小節

雖然我唔記得我幾時識叫人
但係我期待悅兒嘅第一句說話

雖然我唔記得我自己幾時會企起身
而悅兒已經躍躍欲試
想用自己雙腿站起來

社團大佬制

舊同事B君上班已有一段日子
明顯地比起係前公司長進了
無再好似以前咁表弟性格
交件嘢俾佢簡直係超額完成
甚至超出我嘅預算

我話俾我阿頭知單野攪掂咗
佢都有啲愕然
因為自從我俾好多鎖碎嘅事纏住
又無人真正幫到我手
我已經無咁productive

但係有得必有失
由於B君係我推薦入黎
完全係人事關係
有乜唔掂都入我數

有晚佢女朋友係樓下等
但係落左樓先急call返上樓
我心裡面諗如果係印度仔
我諗都唔使諗就摘佢上去啦

但係由於我明白有人等嘅感受
結果又係我加班

Wednesday, April 29, 2009

Wednesday, April 22, 2009

讀書

正當我香港嘅朋友都仲讀緊書
持續進修會計、CPA、金融、碩士

我反而想去讀返個天文或者藝術科
大學時明知道讀左出黎實搵唔到工
所以無讀唔到
宜家反而想繼續讀返自己真正有興趣嘅嘢

但係以前係IT研究生
無端端downgrade由頭學起又有啲不是味兒
所以都係自己自學先啦
文憑嘅嘢有幾黑暗我都幾清楚
又何必去趕呢趟混水呢

與女律師一行

一天放工
與公司的女律師同路
以前都只係say hi
都唔知佢係ABC
即係講嘢講得好快
講唔夠兩句就有兩個中文字

講吓講吓
佢又好坦率咁話係同公司呢一年第一次最長對話
(我心諗: 我係特登唔同任何人講嘢)
我話我係公司好少講嘢

所以我無得罪任何一個黨派
好成功咁逃離辦公室政治...

心靈散步

某日我嘅心靈忽然醒咗
仲決定由我個頭頂出外散步
吸收新鮮空氣
於是乎佢攀上我的鼻子
越過了我的頸項
橫渡我的胸膛時
忽然佢腳底踏空了
差點掉下萬丈深坑
這才發現原來不知何時
左胸多了幾個大大小小的洞
也忘記了怎樣弄出來的...

唔通我呢度先係毒氣房???

今日無神神大執位
而根據經驗
每次執位都會大地震一番

今次無獨有偶將所有亞洲人聚埋一齊
(即係圍住我)
我第一個諗法:「毒氣房」
幸好老闆唔係德裔 ... -_-a

又等睇戲..

Monday, April 20, 2009

毒氣房

早陣子有team人移咗入一間白房
名義上係另組一個department
但係唔知點解我當時有種異樣感覺
覺得有啲唔對勁
唔知點解佢地會用一啲未過probation
我又覺得又唔多掂嘅人去

今日終於發現原來嗰間係好似納粹時期嘅毒氣房
入咗去之後無耐就人間蒸發!

事緣今日印度仔都移咗入去裡面
而我又好關心佢嘅下落
所以就留意吓佢坐咗係已經炒咗嘅位上
先知道原來公司為免影響其他人士氣
整咗間毒氣房

如果印度仔炒咗
我諗我會有啲寂寞 ...

Sunday, April 19, 2009

希臘人教細路

有時候西母會講一d佢細路嘅事俾我聽

例如佢小時候嘅媬母係希臘人
教佢唔好亂丟嘢係房
或者要有手尾將衣櫃關好
就會講一d希臘神祕故仔俾佢聽
如果唔收好d嘢就會有怪物走出黎..

悅兒,我已經讀完《荷馬史詩》
你大把嘢聽喇 *grin*

西母拍賣事件

之前澳洲樓市好景
西母乘機想賣咗間屋
因為佢嗰間係Villa孖屋
而隔離成日好嘈
裝咗部掛牆式電視機係佢嗰面牆
又成日係後園開音樂

偏生西母係教師、讀書人
一口針跌落地都唔開心
搬去第二度係唯一選擇

但係宜家澳洲樓市開始放緩
西母宜家先黎賣樓
仲要拍賣
結果強差人意
賣唔出

:(
睇黎佢又會唔開心一排

Wednesday, April 15, 2009

機械人愛上神

當機械人正在按照指令
搜尋2037天之前的晚上
是否把自己的頭臚安裝回原位
最後過度運算而hang機後

神 沒有把它reset
任由它孤伶伶地棄於一角
因為神 創造人
人卻製造機械人

如果機械人愛上神
那注定一開始已經是文藝悲劇

蘊釀中

公司近排又蘊釀政治黨派衝突
感覺上有好幾個人hold住d resource唔放,近排想發圍
今次又唔知炒幾多人

直覺知道我唔會有事
但係我諗我應唔應該診機鏟除我睇唔順眼嘅人呢?

例如: 印度仔

印度仔尋日係度`晨`入黎做半年無加到人工,
又話推咗出面幾個job
我聽過呢d說話好多次,
通常都係將炒嘅人先會為保面子講嘅說話

其實我想同佢講:
我最近先加咗人工
唔加你係有原因

Monday, April 13, 2009

秋去冬來春又至

冬天不是讀書天
夏日炎炎正好眠
秋去冬來春又至
執埋書包好過年

Thursday, April 9, 2009

禪,不可以言

有日係website睇到呢遍嘢:

「第一天,小和尚問師傅:『何謂禪?』
師傅著小和尚伸出一根指頭,說:『這就是禪。』

「第二天,小和尚又問師傅:『何謂禪?』
師傅又著小和尚伸出一根指頭頭,說:『這就是禪。』

「第三天,小和尚又再問師傅:『何謂禪?』
師傅又再著小和尚伸出一根指頭,說:『這就是禪。』

「第 N 天,小和尚又問師傅:『何謂禪?』
師傅執起刀,斬掉了小和尚那根常常伸出來的指頭。
然後,師傅問小和尚:『何謂禪?』
小和尚想伸出那根指頭--但,指頭已經被斬掉了。」

所以,總結:「禪,不可以言。」

-=-=-=-=-=-=-=-=-=-=-=-=-=-=-=-=

然後朋友問:「那麼...何謂禪?」
我答:「一個字:悟 ?!」

朋友:「悟...咁即係每一個人都會有佢地獨特的見解同答案....」

我:「我諗就好似黑房點燈、每個人都盲摸摸搵緊呢樣嘢」

朋友:「明解,每個人都不斷尋找緊這樣野....
當中有人走對了方向,有d人卻可能走錯路,有的可能走了好多無謂的路...
又可能有d人走對了方向,但係卻被其他人撞倒,誤導..
又可能有d人走錯了方向,係卻被其他人指引番對了方向..」

...

我諗其實佛經都係咁作出嚟 -_-a

Monday, April 6, 2009

10GB

有日埃及仔行埋黎我張枱
問我部電腦ip係乜
然後畀咗張bar chart我
係上個月Internet Download Quota
第一條bar好好好好好好好好好好好好好好好長

大概係咁:
XXXXXXXXXXXXXXXXXXXXXXXXXXXXXXXXXXXXXXXXXXXXX

遠遠拋離第二位:
X

之後我醒起早幾日開住BT過夜...

可惜埃及仔投訴上我阿頭到佢都唔會理佢 -_-a

Sunday, April 5, 2009

結繩記事

原始人喜歡結繩記事
每一個結都代表一件日常生活中一些值得記錄的事情
例如一個結代表捕獲一頭野豬
又一個結代表下了一天雪

如果話人生一開始就不斷係自己條繩上打結
直至某一日
你會發現自己打咗好多個死結

忽然間
你呢一刻先知道原來人生
唔係為了記下你某年某日你買了一套很華麗的衣裳
亦唔係為咗記住你某年某日你得到很多財富
其實係要將你以前每一個心結都解開

你花了大半生去記下一些情愛仇恨
到了某一天你亦需要花相等時間去解開這些種下的結
因為現世所有嘅前塵往事都只是一塲夢

聽君一席話

有時候,人會反思自己的處境
往往係來自身邊月朋友的無心一席話
對於自己想做甚麼、想求甚麼
有時候自己都好迷惘

與君的一妙問
不禁字窮,良久無法應對
反復思考

其實

當時候我諗起悅兒的臉
但係我又覺得你唔會明白呢番感覺

所以我真的只能說
已無所求
好滿意自己呢一刻嘅人生
感謝神嘅安排

Watson Bay

和悅兒去了一趟Watson Bay
Sydney本地人其中一個週末好去處
出名嘅地方唔係海灘
而係有一個高出嘅懸崖(國家公園)
可以眺望一望無際嘅太平洋海平線
懸崖下面就有好澎湃嘅海浪聲

但係由於悅兒實在太似一包米嘅重量
最後都無托住呢包米上懸崖
反而去咗另一面碼頭小沙灘食lunch

Friday, April 3, 2009

x4 Tech Resources

大老闆讚我一個頂四個

...

我心諗: 但係我份糧得一個

Thursday, April 2, 2009

畫布

如果人生是一塊畫布
每個人都在自己的畫布上面繪畫自己的圖畫
有些人專注於小巧瑰麗的線條
有些人積極營造氣氛、著重光影變化
又有一些人在自己的畫布上胡亂塗鴉

小時候我沒有太苦心經營這一幅油畫
一直發現我這一畫越來越亂
雖然已經很努力去將一些舊有的線條修正
於是又在某處批上另一層顏料
試圖解決問題

但還後發現在最初的構圖上已經不對題
好想重新再拿一張畫紙重頭再畫一次
正想把這塊塗滿了油彩的畫布從畫架御下
卻又發現這塊畫布由於之前在上面塗上很多層
現在已經被塗上厚厚顏料
沉甸甸的感情
熟識的線條
於是又再專注這塊畫布上

Monday, March 30, 2009

2037電腦程式員

時為2037年
機械人技術已經成熟
普及至家用用途

所有機械人除了必須遵守機械人三大守則外
為了避免機械人自我改動這些守則
機械人也不可以編寫任何程式
以防機械人造反、違抗人類的命令

而電腦程式員於是成為受監管行業
防止不法之徒改動機械人程式搗亂

以下是一間IT公司監聽的內容
程式員A進入公司,和程式員B講咗聲早晨
然後把自己的圓帽除下
露出頭上的禿頭
程式員A小心地把公司天花垂下的電線插入自己的頭頂
腦袋慢慢地被抽出頭頂
然後程式員A緩緩地癱軟在椅上、失去知覺

如果中央發現程式員有任何異樣
中央有權扣留程式員的腦袋

。。

其實呢種情況係2009年已經一直進行
即使身體能夠返到屋企
而負責思考嘅腦袋卻一直被扣留係公司

迷失

有一年冬天
去了New York
一個人拿着地圖
以為可以憑著雙腳找到我想去的四間藝術館
結果我低估了美國地圖的scale
食咗好多手推車熱狗都未到一個街口
出咗subway之後根本無可能靠雙腿慢慢行去目的地

那一刻
我諗起《The Legend of 1900》
如果佢落船嘅地方唔係紐約
如果佢唔係望住令人迷失的大城市街道
如果佢唔係感受到那一種湮沒於高樓大廈之中的無助感
可能佢已經有勇氣踏出舺板的一步

最近又有啲迷失嘅感覺

大停電

聽說Bondi有幢大廈煤氣爆炸
四小時後央及City大停電
而停電不夠五分鐘
桌球枱已經塞滿人、仲要輪丑
而由於無電關係
wii及街機都玩唔到
連剩下嘅soccer枱都圍滿人

而係停電之前的一刻
我正想投訴印度仔又做錯嘢
係唔夠一分鐘佢已經等緊打pool

我諗係天叫我收手啦。。

Sunday, March 29, 2009

夢見

又夢見英雄君
回到童年
為了我阿哥丟了我兩本漫畫而不快

君問我因何不快、又久未聯絡
我答又係老哥問題
而久未聯絡、只因君太忙
我係明白賢君有工作、趕夜校、忙拍拖
不敢打攪

如果你這個黃金年紀不忙這些,
更待何年?

所以唔好再報夢投訴我無搵你 :)

跳火圈

係我老婆嘅指導下
悅兒自兩個月大已經會意會我地要大大
平時唔會哭哭鬧鬧
不怕陌生人
又不吝嗇自己的笑容

如果進展良好
悅兒係不久將來有望可以投身馬戲班
可以同獅子老虎一齊跳火圈、走鋼線

人生有高低

這些年
經過了這麼多
順境逆境都試過

人生如意時時
會害怕下一瞬失去這一刻的幸福
而你永遠只能看着細沙從指縫流出
想留也留不住

人生不如意時
會告訴自己這一刻很快成過去
即使你知道那還是要渡日如年

讀遍古今書籍也不能幸免
你 找到答案嗎?

Saturday, March 28, 2009

又打針

親愛的悅兒

今天你的父親早上問你去打針好不好
佢見你無反對、只係望住你阿爸笑
於是你阿爸摸了你的光頭一下
然後就帶悅兒去睇醫生

當你父把你放在床上
你還會發出悅耳的笑聲

第一口針
你的表現很好
你只係亨了一聲
然後你用渴望關懷的眼神凝視著你的父親
心裡面應該還記得你父告訴你的話:
男兒有淚不輕彈

第二口針
你終究忍耐不住痛楚
大呼一聲後
面孔瞬間轉成紅色
扭曲成《米字型》、良久不散
但是卻未再哭叫半聲
(就好似痛到嗌唔出聲)

三刻過後
悅兒你已然平復
小小胸膛仍然起伏不安
最後
你小小的右面頰終究滑下一滴男兒淚


父字

Thursday, March 26, 2009

生命中不能承受第二本Hermann Hesse

再次挑戰Hermann Hesse 《The Fairytales of Hermann Hesse》

唔得喇...

真係太dark
本來諗住讀畀悅兒
點知三句唔埋就世界末日、血流成河

自從上次用咗五年去睇Demian
期間頂唔順、停吓睇吓
我諗我生命中真係無可能承受第二本Hermann Hesse嘅書。。

Tuesday, March 24, 2009

馬拉松

又發神經想一圓跑馬拉松嘅夢
於是又搵咗黑帶高手

據說,我哋呢個年紀
又係呢個年紀:

「係唔應該自尋死路」

係呀!
係自尋死路!!

我地呢啲平時無乜運動嘅人
應該盡可能避免直接縮短壽命嘅事情
於是佢提議:

「晨運」

繼上次想學詠春點知道原來要學太極之後
又一次認清自己

人生第一次吃痛

為了紀念悅兒人生的第一次吃痛
特意記下這篇

係呀,悅兒

你第一次學會痛的感覺係因為你阿爸唔小心撞到你隻腳趾公

。。。

對唔住囉 -_-a

從前的魚缸

上一間公司嘅女老闆係有Model樣貌身裁嘅Blonde
唔講真係以為係雜誌上面啲Model
亦見到好多好難得嘅同事
個個都好搏命,呢個現象係西人公司實在好少見

但係唔知點解老闆無辦法留得住人
所有離開後嘅舊同事都嗔佢唔好
個個都話唔會再打女人工云云
(包括女員工在內)

而當年我出走嘅原因係我覺得佢留唔住有用嘅人
遲早玩完
所以我當時吓叮囑B君如果某某走埋就好搵定後路

當時候女老闆係搵左三個上層人員叫左我入房
用哂威逼利誘
最後叫埋我入房講數
好話講盡後就黑面叫我出去
(Well,亦舒講得好,美人黑面都係美人)

當時心諗
如果佢每個員工臨走佢都噏一大輪
佢真係會好忙、或者某些重要員工會留低

可惜睇黎佢過左一年都未學識點樣「留人」
而我過左一年都未學識「留低」

Sunday, March 22, 2009

表弟

有時候覺得同事都好似我啲表弟
成日都倚賴我。。

魚缸裡的械鬥

婚宴談起近況
在座每一位的公司都裁員
有的公司逼員工五日返四日
有些公司炒了百多人
(公司冷氣忽然勁了好多)

而我公司之前的裁員
美其名是Business Restructure
實質上是由於派系之爭
我阿頭上位之後
大舉剪除舊朝人員、斬草除根
連舊朝的小妹妹都照炒無誤
之後又請返另一批庸人

錢 -- 其實係無慳到
我只係見證了一次辦公室政治事件

如果有朝一日我阿頭倒台
我自然知道自己首當其衝。。

力有不逮

這些年一直都身兼數職
有時接吓contract做、
有時教夜校
又有時改遙距課程的考卷
。。。

一直都認為自己可以做得更多更好
一直都頂硬上
直至之前OT到病了
。。。

今晚下着毛毛細雨
不得不承認
是心有餘而力不足矣

小丑

婚宴間遇到舊朋友
(唔多熟、失散多年)
見到鴉雀無聲的酒宴、無MC
想起昔日自己竟然係搞氣氛的小丑
但係我已經有老婆生埋仔
呢個小丑角色已經好唔配

。。

有啲嘢真係返唔到轉頭

又一個婚禮

一如以往的婚禮
一班唔多熟嘅舊朋友坐埋一齊搭枱食飯
尤其是同新人雖然識咗好多年
但係只能維持係一個地步就不能再交心
這種婚宴可免則免

反觀月頭之前一對新人
雖然人數小
反而就熟人多就氣氛好一點

舊同事B君

阿頭問舊同事B君掂唔掂
我答OK
心諗起碼香港人怕炒友
好過宜家在座嘅每一位
然後我阿頭就好乾脆咁拍版話請佢

就好似我想點就點咁
然後B君就開始話怕OT
早知話請個妹妹仔...

有容乃大

星期五Drinking Day
未夠兩點啲人開始無影
我阿頭唯有將兩件事都堆咗落我到

有條「彈散」一開始就圍住我要完成佢嗰part先
雖然我都明白佢嗰part好緊要
但係都唔使咁嘅語氣呀嘛?

我好懷疑越係底層員工就越好似nothing to lose咁
竟然可以係公司叫囂
最搞笑係佢嘅比喻確實係好精景
我心裡面都好想笑
只係忙到一頭烟笑唔出

佢話就連印度仔都搞掂佢嗰part
我都未交貨
印度仔當然係到死撐云云

我唔想自扁身價
最後我都無出到聲
今日已經夠煩

。。。。

另一邊箱

啲人係兩點過後玩失蹤
包括所有Manager
(俄羅斯仔個女病咗要接仔放學)
我阿頭直情坐係我後面提防我都鬆人

五點半終於趕得切update
偏生印度仔無comit啲嘢就走咗
我阿頭問我佢去咗邊度
我話:He has gone
佢用有啲難以置信嘅表情望住我: "It is only 5:30"

坦白講,我嗰一刻我同我阿頭一樣咁「興」
我畀條「彈散」搞咗成日
點知最後竟然印度仔鬆咗人!!

我有一刻嘅衝動想爆
但係唔知係咪最近睇希臘神話
我接受咗阿波羅神嘅建言:
「有容乃大」
就連印度仔兩點半走咗我都未有提及

嗰陣時印度仔係你interview嘅
我反映過,亦都承認我管唔掂佢

我諗我唔需要再插多兩吓...

最後hack咗入佢account攞返啲嘢
超額完成

Thursday, March 19, 2009

桌球枱

繼之前嘅街機遊戲機之後
公司遊戲房添置了一台酒吧足球機
然後又引入了一張桌球枱

而我期待已久嘅Massage房就只聞樓梯響
仍然維持每星期三分鐘按摩師上office逐個按
好唔夠囉

新HR條款

新HR Manager想追加條款
層鴨式向下面推
於是無厘頭開咗個管理層會議
最後仲要我地簽名畫押
管束下面啲靚云云

當時候我飲住熱茶
條款一條一條數落黎
望住在座每一位所謂主管
都係其身不正(包括我在內)

更何況IT公司星期五免費提供啤酒係不成文條款
咁樣簽咗、第二日有事HR就唔哂孭鍋。。

Tuesday, March 17, 2009

浮光掠影

如果相信人生是一條繩索
而所有事情都只是這條繩索的一小部分
那末一個人這瞬間的決定
也純粹只是一個人
在這一時、在這一刻、這一點的決定
這一刻的我不能否定過去一刻的我
亦不能改變下一刻的命運
過去與及未來都彷如浮光掠影

當然
這一刻的決定會影響將來一連串的未來
但是如果你相信在這一時、在這一刻、這一點的決定是對的
即使可能牽連很廣
我都覺得有嘗試的價值
正因人生如光影難以掌握
倒不如抓緊這一刻的自己
一切順其自然?

不與人群

公司好多人
但係個個都唔多啱傾
我對佢地傾嘅話題一啲興趣都無
例如邊間酒吧好、邊度浦正

我寧願睇多兩首荷馬史詩
我覺得自始至終都不落人群
最多佢地只可以話我離群、孤芳自賞
佢地無辦法係我背係後講啲乜

反而我會有興趣講吓啲湊仔經。。

資格

有日又係茶餐廳遇到個N年無見嘅舊朋友
本來大家N年前都唔係好傾得埋
但係話哂巧遇
逼於無奈嗲左兩句
點知真係唔夠兩句佢就話我唔夠資格講唔知乜嘢
(真係小事到我記唔到係乜)

大姐,使唔使閒話兩句都起哂’鋼’呀?

缺點

近來發現自己的缺點越來越來多
小小事都沉不住氣
亦忘記了有容乃大的準則
要好好反省自己。。

金蘋果

三個女人一個墟

即使希臘神畫也不例外
傳說紛爭女神拋下一顆金蘋果給宙斯
上面寫著〔全世界最漂亮的女神〕

Well, 於是乎在場的三位女神都向宙斯要這顆金蘋果

分別是:
小氣的宙斯老婆 - 赫拉
權力象徵的 - 雅典娜
美麗的 - 維納斯

結果宙斯做咗個英明決定:
「我要諗兩日先」

但係呢隻鍋緊係有人踩嘅
佢就係《木馬屠城記》裡面
搶人老婆Helen返Troy嘅Paris王子

三位女神見逼唔到宙斯
就逼問Paris邊位女神最合適這顆金蘋果

赫拉承諾會賜予Troy為全世界最美麗的國家
雅典娜承諾會令Troy戰無不勝
維納斯承諾會給Paris全世界最漂亮的女人

稚嫩的Paris答了一個影響好多、好多人性命的決定
(最後Paris都係要死)
Paris決定將金蘋果給予維納斯
所以之後Paris遇上紅顏禍水的Helen --
當時全世界最漂亮的女人

然後赫拉&雅典娜好快企係同一陣線
誓要向整個Troy報復

古希臘人的智慧:
千祈唔好得罪女人

Sunday, March 15, 2009

孖生

有日去茶餐廳
有位阿姨特登走埋黎話悅兒真係好靚仔
然後望住我地兩公婆問似邊個多d

其實我唔係話我想個仔特別似我
只係佢真係同我細個幅相一模一樣
(連家姐都係咁話)

...

我決定搵日買個吊咀
掛住我細個幅相係悅兒身上

美人額

我已經望住我個仔個光頭好耐
除咗真係好反光之外
橫睇掂睇都搵唔到佢有美人額

佢而家個樣真係十足十我細個三個月嗰陣
併埋兩幅相好似孖生兄弟咁
就係欠咗個美人額

...

繼承唔到我呢點確實係一種遺憾

挖角

舊同事B im我
唉,我話我忙到九彩
之後佢話佢係舊公司好悶
自從過咗年之後都被投閒置散
無新project做
日日返工只係上網

我就打蛇隨棍上,
問佢有無興趣黎我公司到做
大家香港人
係咁嘅經濟差嘅大圍因素下
有個照應都好嘅。

仲有可能推動我嘅末日計畫 .\_/."

芳容

夢中看見從前很多朋友

有的趾高氣揚
有的胡說八道
有的碎碎諗諗
有的自傷自憐
有的孤芳自賞
有的自以為是
有的閃閃縮縮
有的逃避現實
有的偏執成狂
有的人事已非
有的庸庸碌碌
有的渾渾噩噩
有的天真如昔

人的性格會因環境而改變、或者堅持如往昔

奈何只有你的芳容沒有選擇餘地

即使有沉魚落雁之容、羞花閉月之貌

在歲月輕帶下

月下淍零

零食

公司同事喜歡交換零食
我也不例外
不過我會特登買d奇形怪狀嘅零食

繼有:

卡樂B薯片
印尼薑糖
似石頭仔嘅朱古力
日本小梅糖
台灣剝皮話梅(我怕西人唔識吐)

同事J可以話一直帶到尾
畀乜食乜



直至 ---

零食紫菜片

同事J : 「Er .. no thanks, my mother don't want me to eat strange thing」

Friday, March 13, 2009

魔法師 -> 魔術師

之前嘅非人OT生活
令我明白一件事
就算你平時點勁都好
係忙亂、頭昏腦脹既情怳下
你都會用啲平時好不削嘅方法去敷衍了事
仲要畀同事發現。。

就好似一個失去法力嘅魔法師
淪落為只靠欺騙手法生存的魔術師一樣

Thursday, March 12, 2009

你好得。。

有些人

講野好叻,

好多藉口,

實際做時永遠唔見影



印度仔,

你好得。。

究竟係咪我把間尺同佢嗰把有d唔同呢?

末日計畫 (Research)

為了實行末日計畫,我開始上網搵工

雖然話就話經濟唔好,但係IT都還可以,有唔少工,只係昇幅好少,計Bonus就好難說得準。

所以如果要走,都係因為做得唔老黎先至走。

話時話今日開會有d唔老黎。。

末日計畫 (Planning)

我決定啟動末日計畫:

先炒印度仔,
再炒公仔佬,
再昇淨落嗰條靚,
跟手自己炒埋自己

Wednesday, March 11, 2009

心中的間尺

每個人身上都有兩把間尺
一把用係別人身上
另一把用係自己身上
而兩把間尺永遠都是不同長度的

量人時特別苛刻
同一件事情對自己又有另一把尺

Tuesday, March 10, 2009

方向感

小時候去長州旅行
成日係啲後街迷路

有一次打完機
行出機鋪門口又唔記得返渡假屋條路
家姐當時候指住天空一個方向
話朝着這個方向直行就返到去

從此我就似裝咗個指南針
揸車睇地圖好容易搵到方向感
受用終生

待悅兒長大後也要教識佢呢個方法

Monday, March 9, 2009

雜物黑房

今日見到office有間雜物黑房。。

好想柄自己入去,唔駛煩

啟蒙

睇完Benjamin Button,
裡面有一段講
往往有一些人的說話會影響你一生
而這個人通常他自己都不知道他的說話會對你有這麼深遠的影響
而你其實甚至乎已經忘記了他的名字

我也曾經有類似的經歷
記得那時候買了台PC壞了
於是乎阿媽搵左個讀Computer Eng的朋友幫忙
佢係咁講咗一堆關於DOS嘅Memory配置嘅嘢
個日可能係我成世人聽得最多電腦智識嘅一日

後來大學揀科唔知揀乜好
於是呆吓呆吓就入咗呢行

到宜家都唔記得條友叫乜名..

膠袋

小時候在柴灣住
那時候的街市很污糟
沒有空調、地面濕滑
雞鴨魚豬吊掛在店鋪面前
空氣中瀰漫着血腥味

那時候塑料袋並不普及
無論買魚或買菜
都係用舊報紙包住
再用鹹水草扎住

人類究竟可唔可以番轉頭
唔再用膠袋、用番鹹水草?
我諗真係好難
宜家反而越整越衰
超市出埋d劣質再做膠袋
本末倒置..

Friday, March 6, 2009

重逢

朋友喜宴
見番以前Housemate

我對佢嘅生活習慣、思想模式都好熟識
但係自從大學畢業後就失去聯絡
各自各有生活
大家都有對方所不知道的十年

說着、說着
然後、然後

我發覺面前人和我記憶中有出入
而我呢幾年究竟又學識咗啲乜嘢呢?

Thursday, March 5, 2009

媬母走後的兩天。。

媬母回鄉探親
少了一雙手照顧悅兒嘅起居飲食

最唔慣係我

平時只係對住悅兒
吟吓詩詞
講吓世界歷史

都唔知湊BB咁大壓力
家吓要顧住餵奶都已經筋疲力歇

...

媬母只係走咗兩日咋 ...

內觀禪

這是一個觀察自己呼吸的方法
並不像太極、氣功般要吐納運氣
純粹只係留意你自己的呼吸
一個你平常每天每刻都在做的事情

藉著觀察這個生命最基本的動作
其實可以感受到平常你忽略了的身體訊息

其實身體無時無刻都在告訴你有甚麼不妥
只是你沒有靜心去留意這些訊息

Tuesday, March 3, 2009

困獸鬥

呢幾年唔知攪乜

身邊朋友都話好忙
唔係忙結婚、生仔
就係忙拍拖、讀書

又唔想應酬啲酒肉朋友
(呢類人近年大量出現)

好想去旅行
但係想去嘅地方都好山卡啦
帶唔到個仔去

困獸鬥

古法治療 - 推拿

唔知係感冒引發背部肌肉舊患
定係本來就要發出黎
總之出完冷汗就肩膀痛

於是去咗轉相熟推拿店
今次老闆娘建議拔罐括沙


成個背脊紅哂。。

古法『自』療

係澳國滯留多年
每次遇有感冒傷風
都會沿用此療法

--- 瞓覺焗一身冷汗

唔係話唔信西方醫學
只係每次都叫你多休息、多開水
充其量開些Panadol給你
好似「甜蜜蜜」裡面嘅Rose話齋
咁睇醫生黎做乜嘢?

今次為了醫生紙走了一趟西醫
意料中多休息、多開水
幸好Medicare包診金

定風波

早前買咗唐詩宋詞返屋企
諗住得閒吟番兩首詩詞畀悅兒聽
費時將來佢淨係識英文

點知一翻書
就見到自己最愛嘅蘇軾:定風波
一望先知道原來我吟錯咗十年呢首詞幾個字
好彩我一直都無吟過畀人聽啫

不過江湖生活刀光劍影
有番兩首詩詞旁身
確實係能夠調劑下生活嘅。。

「莫聽穿林打葉聲,何妨吟嘯且徐行。
竹杖芒鞋輕勝馬,誰怕?一簑煙雨任平生。
料峭春寒吹酒醒,微冷,山頭斜照卻相迎。
回首向來蕭瑟處,歸去,也無風雨也無晴。」

Monday, March 2, 2009

印度仔

今次加班加到2am嘅原因
除了是一貫趕住demo (其實裡面唔work)
亦同功印度仔有直接關係
2am臨走我都不忘email佢嘅錯處

第二朝一早佢就好似佢仲火過我
我都話咗我明白佢係未完成我地就要用
又唔係第一日寫code
點會無bug無漏洞至得呢?
點解係到死咬話佢係一啲錯都無?
係零Documentation情怳善下,
唔通我零晨兩點問你點用咩?

仲有。

我知你係有料,但就係有料唔做好,
你叫我點寫你下次份Perference Review?(苦笑)

病倒了

係連續不停咁加班加到嘔嘅情況下,
身體終於都頂唔住,病倒了

可能係之前嗰晚捱到2am,
之後趕住去DH葬禮,
大熱天時著住黑色衫周街走,
然後教堂空氣又唔流通,
啲黑色西裝友都忍唔住用Service Book扇涼,
Service Book上面的又印住DH個樣。。

中途離開,但出門口終於見到DH剛滿歲的幼子,
願主保守他們一家。

Saturday, February 28, 2009

詠春與太極

某日發起神經
想一圓學詠春嘅夢
於是致敬電給空手道黑帶的朋友
點知佢話我地咁嘅年紀
(即係年紀唔細)
應該學太極、打慢唔打快

想學詠春點知道原來要學太極
落差實在太大喇啩?

Friday, February 27, 2009

兩個婚禮、一個葬禮

今個月好忙。。

生活的意義

這幾天有點彷彿
加班加到頭暈
思維唔係好清醒
反而諗多咗好多以前彿略嘅問題

有些人的生活係醉生夢死
時時刻刻都諗住去飲酒狂歡

有些人的生活係崇尚物質主意
事事都要突顯奢華名牌

而我似未搵到可以我令我沉溺嘅事情
Which sounds like an `Ultimate Question` to me

Thursday, February 26, 2009

近排成日夢見我外父,唔係夢見佢整防盜門、就係整車房。

最恐怖係夢見佢啱啱買咗間酒樓黎做
哇,呢啲品流復雜,返24,食無定時嘅嘢,有排煩

幸好只係發夢。。

或者係我潛意識太卦住我外父吧 -_-a

Wednesday, February 25, 2009

If I ever have a chance …

當我做到頭頂冒湮、頭暈暈時,
聽到永不OT的印度仔話要去食壽司,
重要話 This is my style 。。

我決定咗有機會一定要做佢落嚟。。
由其是佢係我下屬,我實在見得佢太耐喇,好厭!

Imagine this conversation:

我: "老闆,我炒唔到你魷魚,唯有炒我下屬魷魚發洩" (Chinese)
老闆: "What did you say?" (English)
我: "I said you are so good looking today ...."

...

老闆: "Oh, by the way, 我今個月賺唔夠數, 我想炒你魷魚發洩" (Cantonese)

...


小時候聽人說,"有容乃大"
長大了印證,"說易行難"

富西方國家特色嘅共產主意

稅 -----

令人沉重的話題
澳國生活無乜唔好
唯獨交重稅就令我好沉重

雖然每年政府都會減稅
將最高入息稅向下調
但係我還記得早幾年我仍然交緊最高入息稅47%
即係話每一蚊,你要上繳0.47元

好似做又係三十六、唔做又係三十六
又好似同政府打工咁

到呢幾年我份人工無乜增長
終於退出呢個最高稅率範圍
但係我仍要交40%稅

諗深一層
人工永遠追唔上通貨澎漲
其實係變相縮緊水


諗到交嘅稅又會間接俾嗰啲生好多個細佬
又唔盡力照顧佢地
淨係等攞Allowance去賭錢嘅人
我就覺得好無奈

倒好似當中國搞緊富中國特色嘅社會主意時
西方國家反其道而行搞共產主意

Sunday, February 22, 2009

愛神邱比特的另一枝箭

世人往往都能記起愛神邱比特擁有的一枝愛情的箭
被這一枝箭射中的男女會不能自己地愛上對方

但係世人往往就是忘記了愛神邱比特的一枝仇恨的箭
因為愛的反面往往就是恨!

我的年紀

西人母親十年前同我講人生係分階段性
過了二十後大學畢業
同學們各人有各人的際遇

起初會留意誰誰在那大機構上班
誰的前途最好


然後又到了一定時候
會傳來某某人要結婚了




然後又傳來某某人剛生了孩子






當年我聽西母說的時候
覺得是很遙遠的事情
但是這些都一一成真了

然後、然後

當年西母正在經歷的階段
身邊的朋友開始因為某些原因死去

我今年都開始踏入這個階段。

再見了DH

明信片

我喜歡寄明信片給朋友,

那麼篇幅就能限定在一定字數之內,
猶勝一封很長很長的信
會給人過分的沉重感。

Saturday, February 21, 2009

幸運輪: A tank of gasoline

幸運輪係公司嘅餘興及酬賓節目
係一個真人高度、上面寫哂號碼嘅輪盤
好認真地後面有哂一至六十嘅獎品

今次我抽中一次入油免費
公司越嚟越似獎門人遊戲。。

座駕















某日在玩具反斗城看見很多小朋友
在嚷着要爸媽買玩具

十分開心

看見有一架十元澳紙有交易的玩具車
十足十IQ博士入面的小雲車

真係好可愛!



另外又見到可單車拖行的BB車
我見過係街上有西人夫婦就係咁拖住出街

Friday, February 20, 2009

我看見面前有一扇門

我看見面前有一扇門,
正想穿過這扇門的時候,
突然有一個人影閃出、
擋在我的前面,

我定神細看此人無論長相身高、
都和我自己一模一樣,
也不覺驚訝,
只是一心想通過這扇門,
於事我像揑巢一張紙一樣,
把面前的自己揑成一團廢紙。

但是這團廢紙卻漂浮在半空、仍舊擋著我的前面。

從這團廢紙之中,
有一條臂膀緩緩伸出來,
接著到頭和身,
這個我又再次完整無缺的站立在我前面,
仍舊擋著我的路。

然後這個我又向我做了相同的事,
把我揑巢成一團廢紙,
然後我和之前的我一樣,
從廢紙之中走出來,
但是走出來的身體郤是孩提時代的自己。

我用孩子的身度望著眼前成人的自己,
那個我仍舊擋著我的路。

原來我還有很遠的路要走。

犯太歲

犯了多年太歲,有d麻木。
年年都話今年比去年差
而去年又比之前一差
咁即係點先?

今年聽講話其實係d廟祝想多d人去祈福先至生安白做多幾個生肖落去
其實係無咁多嘅

不過我係信基督嘅 ...

Thursday, February 19, 2009

絲婚

結婚一周年的紙婚開始,
到結婚二周年的布婚,
三周年的皮婚,
四周年的絲婚,
五周年的木婚,

六周年的鐵婚,
七周年的銅婚,
八周年的陶器婚,
九周年的柳婚,
十周年的錫婚,

十一周年的鋼婚,
十二周年的麻婚,
十三周年的花邊婚,
十四周年的象牙婚,
十五周年的水晶婚,

二十周年的瓷婚,

二十五周年的銀婚,

三十周年的珍珠婚,

四十周年的紅寶石婚,

四十五周年的藍寶石婚,

五十周年的金婚,

五十五周年的翠玉婚,

到結婚六十周年的鑽石婚




結婚
果然係幾千年前由幾個絕頂聰明嘅女人諗出黎嘅制度 ...

Monday, February 16, 2009

The Portrait of Madame Recamier (Jacques Louis David 1800 & Francois Gerard 1805)

1> Jacques Louis David 1800

From Web:

這是大衛最有名的一幅肖像畫,描繪當時社交界首屈一指的美女茱麗葉‧阿戴雷﹝Julie Adelaide﹞。她在 15 歲時嫁給了一位銀行家雅克‧露卡米埃﹝Jacques Recamier﹞成為露卡米埃夫人。 露卡米埃夫人的捲髮在當時的巴黎非常流行,這個髮型模仿的是古代人像的希臘風格。她高腰的洋裝與沙發都是根據古代樣式的典型帝政風格。大衛為了防止洋裝看起來太過摩登,小心地把細節都隱藏起來。還有她的裸足,賦予觀賞者一種類似古典女柛或精靈的印象,強調這幅畫裡面超越時間的氛圍。 位於畫面左邊的大燭台與燈是大衛工作室裡的道具,多半用來描寫古代場景,它們同樣地也出現在另一幅畫《蘇格拉底之死》中。

2> Francois Gerard 1805




David 其實係Gerard的師傅,同一個模特兒,竟然勞駕兩位畫家為佢繪像,令我諗番起Goya: Maja一圖兩畫。。


聞說Julie Adelaide不滿意David的畫風,之後私下搵咗佢徒弟Gerard,所以其實David的畫係未畫完嘅未完成品,但係被譽為David最有名的一幅肖像畫而入羅浮宮。。

相反Julie Adelaide喜愛Gerard所畫的版本,真係風情萬象好多,好明顯佢只係想要個攝影師多過一個藝術家。

反而好想知道如果有Fragonard筆下的Madame Recamier,會唔會合佢心意。。

Jacques Louis David - The Intervention of the Sabine Women (1799)

1748-1825
新古典主義 Neoclassicism

光暗用得好靚,好似有道spot light effect 咁打落去正中白衣女子身上,有Rembrandt (1606)嘅異曲同功之妙

一個人只得一個朋友

心裡面永遠預留一張椅給你

Gustave Moreau - The Apparition (1867)

摩洛 Gustave Moreau
法國 French Painter 1826-1898
象徵主義 Symbolism




Mark 6:17-28
喜歡聖經故事,更喜歡這幅畫的神祕感。

施洗約翰好有型!

Sunday, February 15, 2009

志文圖書有限公司 - 光榮結業

係佢度買咗十年漫畫雜誌,唔多唔少都有感情,
早陣子見到一則訃聞,
心裡面都有數,
只係估唔到咁突然。。

聽d老華僑講,
以前唐人街真係來來去去都係嗰幾個人,
(係真係撞口撞面噏得出名嗰種)。

金寶茶餐廳摺咗之後,
不快了有一段日子,
後來聞說梁太(金寶老闆娘)可能東山再起,
但一直只聞樓梯響。

我個人覺得老式唐人街係好唔同,
起碼你係香港唔會為咗樓下間大家樂摺咗而感到為難,
因為你仲有大快活、美心、舊式茶餐廳。。
外國唐人街少一間就少一間,
加上香港人係國際嘅影響力大不如前,
港式茶餐廳真係夕陽行業。。

全世界嘅海外中文報紙都係繁體字,
全因香港台灣當年多人移民,
宜家係此消彼長之下,
呢種情況可能會係不久將來改寫。。

我個仔應該學繁體定簡體字好呢?

百日照

今天橫風橫雨、天氣驟降。但係已經預約了Photography Studio好耐,惟有包到悅兒成隻大號饅頭咁上車,好彩天公做尾,落車停雨。

遵照Photographer的指示,我兩地兩公婆就係咁擺出唔同嘅姿勢配合小饅頭,畢竟佢先係主角。

Saturday, February 14, 2009

甚麼也不是

不是為工作而工作
不是為玩樂而玩樂
不是為飲凍奶茶而飲凍奶茶

生活。。

其實甚麼也不是。

便利店員

曾經是我的夢想
可以和英雄做夜間便利店員
可以傾通宵、吹吹水

但係而家發現由於經濟不景
夜間便利員只請一個人
連呢個小小願望都無埋
唉~~

半生瓜

曾經聽過老一輩的人說:
如果有日你忽然覺得苦瓜入口唔再苦,
相反仲覺得甘的話,
咁你嘅人生就已經過咗一半。

我一直都覺得呢句說話好有哲學義意,
重點在於時時刻刻都要提醒自己人生係有賞味限期,
千古聖人都唔可以例外,
最重要係過得無憾

我從小就反覆思考呢個問題,
想知道嘅原因唔係怕死,
只係純粹覺得人類除出吃喝玩樂,
生與死都應該同樣重視。

小時候就覺得自己可以活到自己年齡嘅一倍,
即係五歲時就覺得只有十歲命,
十歲時就覺得只有二十歲命,
十五歲時就覺得有三十歲命,
如此類推。

係不斷陪增嘅情況下,計落宜家都有賺好多。。

Wednesday, February 11, 2009

星際漂流 - 1

自從地球被人過度消耗資源後,
我和隊員英雄已經係仙女星系流浪了一段頗長的時間。。

英雄君原本居住在地球上一處名為香港的自治區,
連護照都未攞過,
四十歲人都未出過境,

世事難料,
估唔到佢一係唔出,
一出就出左銀河系。

仲要係Backpacker嗰種體現生活團。。

抹窗工人

你喜歡吊係出面、定還是留係屋裡面拉住條繩索?








Tuesday, February 10, 2009

清晨四點

清晨四點,

街道一片寧靜,

本以為只會碰上幾個醉漢,
點知原來已經到咗日與夜的交替,
已經有西裝筆挺的西裝友上班。

一路行返屋企,
昏暗的街道上,
祇有24小時營的便利店透射出白光。
嗰一刻先發現回家的路上原來途經很多便利店,
只係平日行得太快無為意。

途經嘅便利店夜更店員,
有的在閉目養神、
有的在發呆等時間、
有的在做運動提神。。

正如Herman Hesse在Demian中所講,
白天生活的人和黑夜生活的人可以毫不相干,
更可以互不往來。

但係一旦白天的人越過這條界線,
就會發現呢個世界嘅另外一面,

有的人會為呢一黑暗面所著迷、
有的人會泥足深陷。。

生活。。
其實都可以滿載奇妙

Demo完

Demo 完美地係無error下完成,我阿頭好開心,佢話無出錯,我地成team人都覺得係奇蹟。。

Live有幾多bugs,我地心知肚明啦。。

逆市 Bonus - 突然關咗洞門

我阿頭尋日突然關咗洞門,
好神秘咁話我如果攪得掂呢壇野,
有bonus。

我心諗攪唔掂都要攪掂啦,
攪唔掂嘅話我可以寫定辭職信。。

逆市 Bonus

明明逆市,唔知點解要強迫性加班,界幾多bonus都補唔返

Monday, February 9, 2009

小提琴

最痛苦嘅OT莫過於你原本唔expect你嗰日要OT而最後都OT咗。。

放工時又遇著落雨,撞正剛吃晚飯時間,途人絡繹不絕。

在街角處遇上街頭賣藝的年輕白人在拉小提琴,
途人撐著傘匆匆忙經過他放在地上的鐵罐,
悠揚琴音郤瀰漫著夜雨的晚上。

只有他一人陶醉於他自己的音樂世界中,
彷彿在嘲笑城市中低頭魚貫出入的陌路人。

寫下這一段時,悅的小手扣緊我的尾指睡著了,仿似握緊一柄小提琴的弓。

Sunday, February 8, 2009

2012 Doomsday (2008)

相信套片嘅中心思想係回歸信仰,並不是一味吹唬2012世界就要玩完,它只是人類再次信靠神的一個期限。

但係我個人認為將瑪雅傳說套係耶穌基督救世嘅天主教(片中十字架上有耶穌像)上面有啲牽強,我唔明點解唔純粹用瑪雅異教背景、甚至New Age角度去描述來得乾脆。

戲中的十字架只令我覺得係15世紀西班亞人夾硬放上去,畢竟瑪雅點計都歷史悠久過耶穌好多。

喪屍片反思

好奇怪地
近年的喪屍片都講喪屍橫行後
人類都會四出搶番荒廢城市嘅物資
例如藥品、湮酒
好似搶極都搶唔完咁

係咪佢地想影射而家物資過剩
自從工業革命之後
人此們為了賣出國內大量生產的物資
巧取豪奪、不斷傾銷去其他國家

我們確實生存在物資過剩的年代

Saturday, February 7, 2009

Rene Magritte - Le Chef

OT 時睇到呢幅畫真係好貼題。。

Rene classic 西裝友,最經典係有多個好似Matrix嘅Mr. Smith西裝友半浮New York街頭,貫徹Surrealism風格,個人喜好他的作品是因為他的題材都屬於輕鬆有趣,睇完唔會有好沉重嘅感覺,只會有一種衝動、想攪清楚幅畫畫緊乜嘅好奇。正如佢自己所講:

"My painting is visible images which conceal nothing;

they evoke mystery and,

indeed,

when one sees one of my pictures,
one asks oneself this simple question,

"What does that mean?".

It does not mean anything,
because mystery means nothing either,

it is unknowable. "

此畫家死於1967,pancreatic cancer。

Friday, February 6, 2009

俄國同事 - Follow up

風水輪流轉,今個星期五到俄國同事等埋我upload,其間我又問佢個女考慮完我個仔既proposal未。。

佢只係笑笑口話諗緊,睇黎佢唔多清楚我係好死纏爛打既。。

Thursday, February 5, 2009

清晨三點

OT嘅關係,
多咗好多時間係公司,
發現原來清潔工人都係係十二點過後先開工
有時候甚至三點先至見人影。

初時以為只有我公司先係咁,
及後有次加班到三點,
回家途中見到好多大廈都有好多人係到吸塵清潔,
先至知道原來佢地係零晨先至開工。

呢個城市原來有我唔清楚嘅一面。。

Wednesday, February 4, 2009

男乘客 - 你好,你今年幾歲呀?

悅只有四歲,在巴士上小跑到一位男乘客座前,"你好,你今年幾歲呀?"

男乘客被這突如其來的小孩一問嚇住,正想問佢乜野事,

悅已經自顧自搶著說 "我今年四歲,我最鐘意摺紙飛機,你呢?"

男乘客抬起頭想尋找孩子的家長,悅突然用他的小胖手捉緊男乘客的手臂,一股微溫傳到男乘客手臂上,感覺親切。

悅再次稚嫩的催促在問 "你鐘意做啲乜嘢呀,哥哥?"

男乘客被這個小孩問題攝住,記起小時候想揸的士,上咗小學就想揸飛機,大學以Honour畢業,以為大把世界。結果出左社會之後,人浮於事,漸漸把理想一點一滴融掉於朝九晚五的生活中。

每日返工放工都係同一班巴士,
每日碰口碰臉同一班乘客都係一臉倦容。。

情況有啲似小王子裡面嘅點燈工人,每日只係點燈同關燈。

男乘客不禁想 "係呢,究竟我真正想做啲乜呢?"

拒絕成長

我這一代人,都是拒絕成長的一代
好似永遠長不大的小朋友

今寂是何年

某日在唐人街茶餐廳發呆,由樓上望落過對面一排舊式三層大廈,令我諗番起小時候住係柴灣個陣時既舊式公屋,個陣時讀緊幼稚院,成日就係擔隻啖礶望落街就咁就一日,亦都唔多覺得有老鼠係電視機底爬過係好突兀既一件事情。。

一眨眼,宜家到我個仔出左世,佢亦喜歡望向窗外,我亦樂意抱住佢一起呆望窗外境致。。

Tuesday, February 3, 2009

生活 ....

何需太認真呢.....

The life as a programmer

Programmer嘅生活就好似腦裡面有部心臟起伏顯示儀,長期維持低頻狀態:



情況又有d似腦裡困咗隻烏蠅,不斷發出想吱佢條腸出嚟嘅怪叫聲。。

加班時嘅心臟起伏顯示儀:


而腦袋裡就多咗好多、好多、好多烏蠅,多到想用機關槍亂槍掃射。。。



Monday, February 2, 2009

Magician 魔術師 。魔法師

Definition of the word "Magician" [From dictionary.com]

–noun
1. an entertainer who is skilled in producing illusion by sleight of hand, deceptive devices, etc.; conjurer.
2. a person who is skilled in magic; sorcerer.

1. 魔術師,變戲法的人
2. 術士,巫師

同一個英文字有兩個意思,但係中文則仔細分開為魔術師、魔法師。

歌國女同事

歌國女同事在公司和我一樣屬於較靜的一群,由於為人不錯,又係老臣子,在公司頗有人緣。又由於我同佢分開好遠,以往好少交談。。

直至我個仔出左世,我產假後由公司email得知佢個女亦早我個仔兩星期出世。當時心諗西人果然keep得好,仲咁快番到工。之後公司重組,佢掉左去我隔離位,大家又生左仔女,自然多左交流。直至過左一段真係幾長既時間,有日星期六開OT,d有家室既另一半帶埋d仔女黎探工。。。

佢既女朋友帶左個好cute既囡囡黎公司,當時候心裡面覺得有d唔妥、但係又講唔出有乜唔妥,OT又忙。

結果係我苦思左一個星期後既Lunch,終於俾我諗通左:

原來佢係同性戀既。

只係先前一直都先入為主既錯覺,又諗唔起兩個女人都可以靠人工受孕生女既盲點位。

幸好我一直冇講錯說話,冇問d 好details既野,唔係就尷尬羅。

諗深一層可能佢一直都想話畀我知,只係一直都冇機會。

Saturday, January 31, 2009

九方輸入法

唉.. 臨老學中文

打一段字用成大半個小時....

Friday, January 30, 2009

俄國同事 - 幫我個仔搵女友

俄國仔同事,我知佢有個仔七歲、女兩歲。

今日我問佢 "不如你嫁個女俾我個仔",
佢好認真咁問我個仔幾歲,
我咯咯的答 "兩個月"

佢即刻笑住口搖哂頭、"No no no no" 。。。
當時候我捱緊義氣陪佢加班到九點。。

Tuesday, January 27, 2009

Rene Magritte - La Bataille de l Argonne (1964)

喜歡這一幅畫純粹因為它的二元性質,
好似我同我阿哥咁,一輕一重:

一個似綿花一樣咁輕、
一個似石頭一樣咁重。

Surrealistic 在於又能夠浮係天空上面。

Sunday, January 11, 2009

先下手為強

本來諗住de-friend Facebook公司已經炒左嗰條友嘅account,點知俾人先下手為強。。